Imparte Clara do Roxo
No obradoiro de relato, Clara do Roxo desvelará os segredos da descrición, creación de ambientes, tramas e personaxes. O alumnado atopará a esencia das historias e aprenderá a corrixir e perfilar os textos, a utilizar os recursos literarios e a marcar ritmo e dinamismo na narración. Para conseguilo, o curso mesturará teoría, lectura e exercicios prácticos acompañados con imaxes que evitarán o bloqueo da páxina en branco que se devolverán corrixidos pola profesora cada quincena e que lles axudarán a corrixirse e a atopar o estilo propio.

Imparte Clara do Roxo.
O personaxe é o centro, o núcleo, o eixo das historias. Unha historia mediocre convértese nunha gran historia se construímos para ela un bo personaxe. Emoción, individualización, xerarquización, triangulación, ambientación, tipos de conflito, dilemas éticos, diálogos, voz narradora, roles, puntos de vista, a interacción entre os personaxes, a documentación e os recordos... Todo isto veremos neste curso e nada será igual despois deste obradoiro, as historias que escribas terán unha profundidade que non posuían antes. Profundamos nos personaxes?

Imparte Clara do Roxo
Un obradoiro especial, diferente. Clara do Roxo fará de guía a través da obra e os personaxes de Gabriel García Márquez, que servirán de exemplo para aprender a narrar, a describir e a abrir o maxín a propostas narrativas diferentes. Un proxecto por alumno, totalmente personalizado no que contruirá o seu relato paso a paso: sinopse, escenarios, personaxes principais e secundarios, tempo narrativo, trama, e final. O resultado final será a creación dun relato longo no que confluirán todas as partes.

Imparte María Lado
Este obradoiro pretende dotar ao alumnado de ferramentas, técnicas e coñecementos para escribir poesía. Para iso, María Lado, deterase en poetas e movementos clave da literatura galega cos que aprenderemos os recursos estilísticos, formais e temáticos propios do xénero. Relacionar os coñecementos técnicos con poetas concretos e o seu contexto dará tamén unha idea global das múltiples facetas da lírica. O alumnado coñecerá as características do xénero traspasan tempos e estilos. E como valerse de todos eses elementos na procura da propia poética.

Imparte Antonio Manuel Fraga
Antonio Manuel Fraga achegará ao alumnado ao mundo infantil a través dos recursos literarios, entremesturando teoría, lectura e creación literaria. Aprenderalles a atopar a voz propia, a atrapar ao lectorado cativo, a ofrecerlles protagonistas e antagonistas atractivos e temas axeitados. Durante tres meses guiará ao alumnado a través das correccións e valoracións de exercicios prácticos.

Imparte Ángel De la Cruz
O principal obxectivo do obradoiro de guión, destinado a guionistas con e sen experiencia, é aprender unha metodoloxía e o manexo dunhas ferramentas creativas adecuadas que permitan abreviar e facilitar a escrita de guións paso a paso. Nel se traballará na creación e xeración de ideas e no desenvolvemento das mesmas, dende o xerme inicial ata o guión audiovisual final, incluíndo a redacción dunhas correctas síntese, sinopse de traballo, escaleta, tratamento, redacción final do guión, coas súas reescrituras, así como a súa axeitada presentación para a súa venda e comercialización.

Imparte Eva Ferreira
Neste obradoiro, ao longo de seis meses, intentaremos ir xuntando as vimes necesarias para compor pequenas ou grandes estruturas dramáticas, traballando con todo aquilo que nos faga mover o pensamento.

Imparte Antía Yáñez
Se es un lector ou lectora habitual, este obradoiro é a evolución natural para construír os teus mundos propios no canto de viaxar polos dos máis. ​
Ao longo dos dous meses de verán, a escritora Antía Yáñez ​achegará á mocidade as pautas principais para comezar a viaxar pola senda da escrita con exercicios dinámicos e divertidos. Participante habitual de certames literarios, ela comezou a escribir e a gañar os seus primeiros premios na adolescencia. Agora tócache a ti!

Imparte Vanessa Glemsel
Un paseo pola historia da literatura galega dende a súa xénese ata a actualidade.
Este obradoiro pretende dotar de coñecementos básicos sobre a tradición literaria galega e, mediante a lectura, reflexión e o coñecemento dos textos literarios, chegar ás técnicas, recursos e principais características que os compoñen. Alén de proporcionar unha visión panorámica do contexto histórico, os movementos culturais e as correntes ideolóxicas que determinaron as diferentes tendencias literarias.
Persigue, tamén, fornecer ao alumnado de ferramentas para a correcta escrita en lingua galega e dotalo dos medios precisos para a creación de textos orixinais (especialmente enfocados ao ámbito literario) aplicando ás técnicas e recursos que se traten durante o curso.

Imparte Eli Ríos
Este obradoiro de iniciación á novela percorrerá os camiños da teoría para aplicar o aprendido nunha serie de exercícios cheos de enerxía e vitalidade.
Divertirémonos construíndo tramas, personaxes ou o que a imaxinación nos propoña para chegar a conseguir esa voz propia que teñen os textos narrativos.
A partir de aquí, a aventura da escrita desaugará na ilusión dun libro escrito, desde o primeiro día, por nós. Comezamos?

Imparte Antía Yáñez O Obradoiro de comentario de texto ten como obxectivo fornecer das ferramentas necesarias ao alumnado para que este sexa quen de elaborar textos con espírito crítico, analizando os temas tratados de xeito correcto e ofrecendo argumentos ben construídos. Aínda que está especialmente dirixido a mozos e mozas da ESO e bacharelato, os adultos e adultas poderán tamén aprender as bases do comentario de texto neste obradoiro.