Valoracións e correccións de obras literarias

Amadeo Cobas naceu en Noia (A Coruña). Cursou estudios de Dereito na Universidade de Santiago de Compostela. Escribe en castelán e galego. Ten publicados os seguintes libros en solitario: Un amigo en el Galacho, 2001, Contos de viaxe, 2002, Miranda, 2004, Pasar a la posteridad, 2005, As pantasmas sodes do que non hai, 2007, A cacería, 2016, premio de novela Cidade de Riveira, Illas Cíes, poboadores do Atlántico, 2016.
E colaborando con outros escritores: Alma de Beiramar, 2003, Historias de Loarre, 2005, Aragón: ríos de arte, 2006, Monegros, 2006, Historias para catar, 2006, A doenza da paisaxe, 2007, Ducha escocesa, 2008.
Articulista en diversas revistas culturais, foi colaborador dos suplementos de crítica literaria dos xornais Heraldo de Aragón (Artes y Letras) e Diario de Teruel (El Parnaso) e éo do blog de crítica literaria La tormenta en un vaso. Xurado en diversos premios literarios e participante noutros, acadou varios galardóns, como o 5º premio de novela Cidade de Riveira, premio no VII Certamen de Relatos “Tierra de Monegros”, de Huesca, a mención honorífica na modalidade de conto do Premio Platero 2005, en Ginebra (Suiza) ou o accésit de poesía no X Certamen Manuel Oreste Rodríguez, de Paradela (Lugo).
É membro da Asociación de Escritores en Lingua Galega e foi membro fundador da editorial Tropo Editores. Durante anos vén coordinando e participando en diversas actividades literarias en concellos, bibliotecas e demais institucións públicas coma o Instituto de la Juventud da Diputación General de Aragón, a Diputación Provincial de Zaragoza..., coma privadas, tal é o caso da entidade bancaria Ibercaja ou bodegas Enate, por poñer un par de exemplos. Estas actividades consisten en ciclos de conferencias e actuacións varias (proxeccións de películas, debates, excursións literarias...), clubs de lectura ou cursos de escritura creativa, entre outras.
Vén de constituír, xunta doutros escritores galegos, a Asociación Cultural Catropatacos para a promoción de actividades culturais, participando na organización e como xurado do certame de relato curto microCatrorelatos, que leva adiante o Café De Catro a Catro, en Vigo. Foi creador da idea Historias para coñecermos Vigo, un conxunto de oito libros que foron editados en 2016 por Editorial Elvira coa colaboración do Concello de Vigo.

Manuel Sánchez Gálvez é sobre tódalas cousas un lector dos que non poden vivir sen ler. E, às veces, tamén é escritor. Colabora dende hai tempo como lector editorial e corrector de estilo con varias editoriais a nivel nacional. Sempre cunha visión positiva pero realista, en cada texto que revisa pon toda a súa paixón, co obxectivo de que cada obra dea o mellor dela mesma no momento de ser presentada a un concurso ou a unha editorial.

Como escritor publicou dúas novelas en lingua galega durante o ano 2016 (Maelström, Maelström, Ed. Galaxia; Os consellos de Carlos Calvo, Ed Elvira). Ademais xestiona unha librería familiar na cidade de Vigo o que, xunto coa súa experiencia, dálle una visión moi práctica do mercado editorial.

Eva F. Ferreira (Ourense, 1978) é autora, directora e docente teatral.

Titulada en Arte Dramática (ESAD de Galicia) e especializada en Práctica Escénica e Cultura Visual (MNCARS/Artea). Anteriormente licenciouse en Filoloxía Inglesa na Universidade de Santiago de Compostela, onde tamén comeza estudos de doutoramento en Teoría da Literatura e Literatura Comparada.

Como autora ten publicado pezas nas revistas Casahamlet, Efímera e RGT. Figurou tamén nos volumes colectivos “Novos Autores II” (Cadernos Laiovento, 2009), “A voltas coa dramaturxia. Dramaturxias actuais en galego.” (Núa, 8) e “O Teatro de Xesús Pisón” (Casahamlet, 11), coas pezas Ofélia, Once postais desde o deserto de sal e De cóxegas e cheiro a mazá, respectivamente.

Gañadora en dúas ocasións do premio do xurado do certame Diario Cultural de Teatro radiofónico da Radio Galega, con O quinto inverno (2017) e Poema sinestésico para tres voces e un can (2012).

En Ourense traballou como asistente de dirección e dramaturxia con Ánxeles Cuña (Sarabela Teatro), na peza Tango. Na mesma cidade, no marco do FITO interveu no relatorio “A dramaturxia feminina en Galicia” (I Encontro Mulleres creando, 2015); e no Festival Outono Fotográfico fixo parte da exposición Je ne baise plus, de Iván Merayo, cun poema dramático que daba nome ao proxecto.

Vinculada nos seus inicios a Estaleiro Editora; desde a súa creación parte integrante da Asociación Galega de Dramaturxia (Dramaturga).

No ámbito da educación non formal deseña e imparte obradoiros artístico-educativos no rural lucense, onde reside, e colabora en proxectos de creación vinculados á comunidade e o territorio.

Na actualidade participa no grupo de escrita teatral DramaturXA, do Centro Dramático Galego, coordinado por Manuel Lourenzo.